'మై వాపస్ ఆవుంగా'.. పాక్ అభిమాని మాటలకు భారత సైనికులు ఫిదా!

కళకు, అభిమానానికి సరిహద్దులు అడ్డుకావని నిరూపిస్తూ ఒక అరుదైన సంఘటన వాఘా సరిహద్దులో చోటుచేసుకుంది. భారత సినీ దర్శకుడు ఇంతియాజ్ అలీ, సంగీత దర్శకుడు ఏఆర్ రెహమాన్‌లను కలిసేందుకు పాకిస్థాన్‌కు చెందిన ఒక అభిమాని 20 కిలోమీటర్లు ప్రయాణించి వచ్చాడు. ఈ భావోద్వేగ సంఘటన ప్రస్తుతం ఇరు దేశాల్లోని ప్రజల హృదయాలను తాకుతోంది.

ఇంతియాజ్ అలీ దర్శకత్వంలో వస్తున్న 'మై వాపస్ ఆవూంగా' సినిమా ప్రచారంలో భాగంగా జూన్ 7, 8 తేదీల్లో వాఘా-అట్టారీ సరిహద్దు వద్ద "జై హో - ఎ మ్యూజికల్ సెల్యూట్ టు ది బ్రేవ్‌హార్ట్స్" అనే కార్యక్రమం నిర్వహించారు. ఈ కార్యక్రమంలో ఏఆర్ రెహమాన్ తొలిసారిగా సరిహద్దు వద్ద ప్రత్యక్ష ప్రదర్శన ఇచ్చారు. ఇంతియాజ్ అలీ, నటులు దిల్జిత్ దోసాంజ్, వేదాంగ్ రైనా కూడా పాల్గొన్నారు.

ఈ విషయం ఇన్‌స్టాగ్రామ్ ద్వారా తెలుసుకున్న లాహోర్‌కు చెందిన సాద్ షేక్ అనే అభిమాని, తన అభిమాన దర్శకుడిని చూడాలనే ఆశతో గుల్బర్గ్ నుంచి వాఘా సరిహద్దుకు బయలుదేరాడు. 2004 తర్వాత మళ్లీ సరిహద్దుకు రావడం ఇదే మొదటిసారని, సరిహద్దులనే భావన తనకు నచ్చదని అతను పేర్కొన్నాడు. 'జీరో పాయింట్' వద్ద ఇరు దేశాల ప్రజలు ఒకరినొకరు తాకకుండా మాట్లాడుకునే అవకాశం ఉంటుంది. అక్కడ ఇంతియాజ్ అలీని చూసిన సాద్.. గట్టిగా పిలిచి తన అభిమానాన్ని చాటుకున్నాడు. ఇంతియాజ్ కూడా నవ్వుతూ ధన్యవాదాలు తెలిపాడు.

ఈ సందర్భంగా సాద్.. సినిమా టైటిల్ అయిన "మై వాపస్ ఆవూంగా" (నేను తిరిగి వస్తాను) అని అనడంతో భారత్ వైపు ఉన్నవారు చప్పట్లతో, కేరింతలతో ఆనందం వ్యక్తం చేశారు. "ఆ క్షణం కళ గెలిచింది" అంటూ సాద్ తన అనుభవాన్ని సోషల్ మీడియాలో పంచుకున్నాడు. విభజన, ప్రేమ, జ్ఞాపకాల నేపథ్యంలో తెరకెక్కిన ఈ చిత్రం జూన్ 12న విడుదల కానుంది.